Laburpena

Txosten hau EAEko erakunde publikoek familien kontziliazioa bultzatzeko azken urteotan bultzatu dituzten jardueren barruan kokatzen da. Kontziliazio erantzukidea, gaur egun ulertzen den bezala, 2006an aipatzen da Familiei Laguntzeko Erakunde arteko II. Planean. Eusko Jaurlaritzak euskal gizartean kontziliazio erantzukidea indartzeko helburuarekin jardun du, kontziliazioaren garapena hiru eremu handitan bultzatuz: pertsonala, familiarra eta lanekoa. Lan honen esparruan, gure ingurunean kontziliazioa errazteko eta EAEko testuingururako berritzaileak diren programak eta zerbitzuak jasoko dira. Alde horretatik, azterketa honetatik kanpo geratzen dira, Euskadin aurreikusita daudelako, prestazio ekonomikoei eta ordaindutako baimenei buruzko neurriak.